اخبار التكنولوجيا

السبب الرئيسى وراء الخلاف بين هواوى والسلطات الامريكية

يمكن اللى مش متابع للمشاكل ما بين أمريكا وشركة هواوى من بدرى قبل الأحداث الاخيرة وليه شركة هواوى بالتحديد هى المقصوده عن أى شركة موبايلات أو معدات اتصالات صينية تانية هيعرف إن الأسباب الحقيقية للصراع ده ليه أسباب كتير غير المنتشرة مؤخراً … ده اللى أكده خبراء كتير محايدين (الى حد ما) فى أكتر من جريدة مشهورة زى ال NewYork Times وWashington Post وغيرهم الاسباب دى بتتلخص فى تلات نقط رئيسية :-
1- 5G Technology.
2- Chip & Semiconductor Industry.
3- Mobile Manufacturing.

ال5G Technology :
هواوى فى 2018 استحوذت على حوالي %31 من حصة شبكات ال4G حول العالم (مصدر 1) لدرجة أنها فى مقال فى صحيفة الواشنطن بوست السنه دى (مصدر 2) أتذكر أن حصتها من السوق السنة دى مع بداية تطبيق ال5G تفوق حصة اريكسون ونوكيا مجتمعين وهما المنافسين رقم 2 و3 فى المجال ده .. زائد أنها تمتلك أكبر عدد من براءات الاختراع فى تكنولوجيا ال5G على مستوى العالم (مصدر 3) .. طبعاً ده معناه أن الصين هتقود العالم فى مجال هام جداً زى ده هيتحكم تقريباً فى كل نواحى الحياة فى السنين الجاية وده شىء أكيد يتعارض مع النموذج الاقتصادى لأمريكا وهو أنها يكون لها الريادة فى أى مجال أياً كان أو على الأقل يكون عندها منافس قوى .. خصوصا انها لا تمتلك على الأقل شركة منافسة فى أول 3 مراكز فى السوق ده (أريكسون شركة سويدية ونوكيا شركة فنلندية) … وده اللى خلى أمريكا تبلغ باقى الدول أنهم ميتعاملوش مع شبكات هواوى لأسباب كتير(موجودة فى مصدر 9) وفى دول استجابت زى اليابان وتايوان واستراليا ونيوزلندا … وفى دول مستجابتش زى ألمانيا وفرنسا وإيطاليا وماليزيا والبرازيل وبعض الدول الأخرى … وفى دول لسا بتدرس الموضوع زى كندا وبريطانيا (مصدر9) .

الSemiconductor Industry :
الصين بتصنع 30% فقط من احتياجاتها من الشرائح الالكترونية وأشباه الموصلات (اللى هى بتشمل مثلاً الcpu ,وال motherboard وكروت الشاشة وغيرها كتير)(مصدر 4) … لكن الصين وضعت خطة أسمها صنع فى الصين 2025(مصدر5) هدفها أنها تصنع 70% من احتياجاتها … أحد أهم الأعمدة الرئيسية فى الاستراتيجية دى هى هواوى وبالتحديد شركة Hisilicon المملوكة لهواوى وهى الشركة الصينية الوحيدة تقريباً اللى بتقدر تصنع الـ processors للموبايل زى (kirin980 كمثال) بالاضافة لشريحة للاتصال بال5G فى موبايلاتها اسمها (Balong 5000) وفى تصريح استعراضى قالت هواوى أنها مستعدة تبيع الشريحة دى لapple فقط ومش هتبيعها لأى شركة صينية أيا كانت (مصدر6) .. وده طبعاً لأن apple حتى الان منتهتش من تصنيع الشريحة الخاصة بيها … وتعطيل شركة هواوى دلوقتى ممكن يأثر على قدراتها فى تصنيع الشرائح دى وبالتبعية هيأثر على خطة الصين .

ال Mobile Manufacturing :
لا يخفى على أحد أن هواوى أصبحت رقم أتنين على مستوى العالم فى عدد الاجهزة المباعة حتى وقتنا هذا متفوقة على أبل (مصدر7) وحسب خطة الشركة أنها تبقى رقم واحد بنهاية 2019 أو بنهاية 2020 على أقصى تقدير(مصدر8) بالرغم من أن هواوى ممنوعة من أنها تبيع أجهزتها فى أمريكا لكن العكس مش بيحصل مع أبل وبتقدر تبيع فى الصين وده طبعاً بيأثرعلى أبل كشركة أمريكية فى مقابل مكاسب هواوى وغيرها من شركات الموبايل الصينية .

وبناء عليه اللى هيسيطر على التلت مجالات دول فى السنين الجاية بجانب طبعاً مجالات أخرى هيكون ليه الكلمة العليا

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق